Бүгін, 24 шілде күні Өскемен қаласында байқалған атмосфералық құбылыстарға байланысты тұрғындардың алаңдаушылығын тудырған бейнематериал тарады, деп хабарлайды BöriTimes.
Осыған байланысты ШҚО бойынша экология департаменті «Өскемен тынысы» экологиялық бюросымен бірлесіп, өнеркәсіптік кәсіпорындардың санитариялық-қорғау аймақтарында жоспардан тыс мониторинг жүргізді, .
«Өлшеу жұмыстары аккредиттелген зертхананың аясында сертификатталған құрал-жабдықтар арқылы жүзеге асырылды. Зиянды заттардың шекті жол берілетін концентрациялары (ШЖК) бойынша асып кету фактілері тіркелген жоқ. Қазіргі уақытта атмосфералық ауаға мониторинг жалғасуда. Өнеркәсіптік нысандар штаттық режимде жұмыс істеп тұр, төтенше жағдайлар тіркелген жоқ», — делінген аймақтық экология департаменті таратқан хабарламада.
Мамандардың айтуынша, желсіз ауа райы мен төмен температура ластаушы заттардың жерге жақын қабаттарда жиналуына ықпал етіп, көзге тұман немесе түтін түрінде көрінуі мүмкін. Дегенмен, барлық көрсеткіштер бойынша ауа сапасы белгіленген нормативтерге сәйкес келеді.
Экология департаменті азаматтарды тек ресми ақпарат көздеріне сүйенуге және расталмаған деректерге сенбеуге шақырады.
